حلم

أعيش وأحلم بحلم يعيش
وتوب الحلم مايكفيش
ومركب صبري متوديش
فاعيد الحلم من تاني

ببيت حته من الجنة
وانا بحبيبتي باتهنى
وحبة الحزن يستنى
فافوق واغرق في احزاني

واعيد الحلم من تاني

بصاحب في الزمان قنديل
وفي السكة يكون لي دليل
يشيل وقت الحمول ماتميل
فافوق ولالقيني وحداني

واعيد الحلم من تاني

بكلمة تداوي ولا تجرح
بود وطيبة راح تطرح
وفينا الحب ليه مطرح
الاقي الكلمة قاتلاني

فاعيد الحلم من تاني

أكون فارس في ليل حواديت
فتحت بلاد كتير وغزيت
على رووس العدا غنيت
فالاقي مخاوفي منعاني

فاعيد الحلم من تاني

بلادنا تشيلنا في عيونها
ونخلص ليها مانخونها
ندافع عنها ونصونها

والاقي بلادي رافضاني

فاعيد الحلم من تاني