ملهمة

لكل كاتب تجربة
ولكل شاعر مُلهمهْ
يوصف جمالها
وف عيونها
الف وغنى مَلحمهْ
وكل يوم ..يشوفها فيه
يرسم عيون متبسمهْ
وكل كلمة حُب قالها
علشان عيون المُلهمة
......
يمكن صحيح شاعر انا
باكتب غناوي ودندنة
باكتب قصايد انما
عمري ماعشت ف تجربة
عمري ماكان لي مُلهمهْ
باكتب غناوي غزل وحب
عن ضحكة صافية وفرح قلب
والدمعة فيا مِعَلِمَهْ
واوصف واقول اني أمير
أعيش في قصر ..البس حرير
وانا في اودتي عالسرير
لابس بيجاما مقلمهْ
بوصف طيور
ساكنة السما
رافضه تعيش متكممه

رغم ان أنا قلبي اسير
عمره ما يوم شاف السما
بوصف في شمس
فــدنيا ضي
ودنيا قلبي مغيمهْ
بوصف قلوب
كارهه السكات
بوصف قلوب متكلمه
وفقلبي محبوس الكلام
كل كلامي همهمة
حتى الغناوي بالسكات
جوه اللسان متلجمة
بوصف عيون
عاشقة الغنا
بالحب ليا مِسَلمهْ
بوصف تجارب
دنيا واسعة
وأنا تجاربي منمنمهْ
بوصف في برج
نجاح كبير
وانا في اول سِلمة
وعكس كل الشعرا دول
كان في حياتهم ملهمهْ
أما انا
واللي كتبت بمَعلَمهْ
عن حب كان .... وعيون تبان
لو وسط دنيا مضلمهْ

ملهمتي قاعدة فوق كتاب
ملهمتي كانت ........... مَقَلمة

ملهمتي كانت مقلمة

قليل من الصمت

خرس اللسان عن الكلام واحجما......فلم أجن شيئاً منه حين تكلما